|
ПОСЛАНИЕ ВАСИЛИЮ III. ФИЛОФЕЙ.
Иже от вышнея и от всемощная, вся содръжащия десница божия, имъ же царие царствуют, и имъ же велицыи величаются и силнии пишут правду, - тебе пресветлейшему и высокостолнейшему государю великому князю, православному христианскому царю и всех владыце,броздодержателю святых божиих престол святыа и вселенскыя соборныя апостольския церкви пресвятыя богородицы, честнаго и славного еа успения, иже вместо римския и констянтинопольския просиявшу. Старого убо Рима церкви падеся неверием аполинаривы ереси ; втораго Рима Константинова града церкви агаряне внуци секирами и оскордъми разсекоша двери. Сия же ныне третиаго новаго Рима, деръжавнаго твоего царствия святая соборная апостольскаа церкви, иже в концых вселенныа в православной хрестианьстей вере во всеи поднебеснеи паче солнце светится. И да весть твоа держава, благочестивый царю, яко вся царства православныя хрестианьския веры снидошася в твое едино царство; един ты во всей поднебесной хрестианом царь.
Подобает тебе, царю, сие держати со страхом божиим, убойся бога, давшего ти сия; не уповай на злато и богатсво и славу: вся бо сиа зде собрана и на земли зде остают. […] Вся убо твоя к богу чистая вера и любовь ко святым божиим церквам, но и еще, царю, исправи две заповеди. Ежи во твоем царствии не пологают человецы на себе право знамения честного креста, о них же издалеча проведыи апостол Павел глаголаше : прежде писах вам, ныне же, плаче, глаголю о вразех креста Христова, им же конец - пагуба. Второе: да исполниши святыя собраныя церкви епископы, да не вдовьствует святая божия церкви при твоем царствии. Не приступай, царю, заповеди, еже положиша твои прадеды, великий Костянтин и блаженный святый Владимир и великий богоизбранный Ярослав и причии блаженнии святии, их же корень и до тебе. Не обиди, царю, святых божиих церквей и честных монастырей, еже данное богови в наследие вечных благ, на память последнему роду. О сем убо святый великий пятый собор страшное запрещение положи.[…] И ныне молю тя и паки премолю, еже выше писах : внимай, господа ради, яко вся христианскаа царство снидошася в твое царство, по сем чаем царь царство, ему несть конца. Сия же писах ти, любя и взывая и моля щедротами божиими, яко да преминиши скупость на щедроты и немилосердие на милость: утеши плачущых и вопиющых день и нощъ избави обидимых из руки обидящых. Не обидите, рече господь, сих менших, верующих в мя, ибо аггели их видят всегда лице отца моего, же есть на небесах. Блажен, рече, разумеваяи на нища и убога, в день лют избавить его господь; господь сохранит его, и живит, ублажит его на земли, и не предаст его в руки врагом; господь помощь ти. Да аще дбро устроиши свое царство, будеши сын света и гражданин вышнего Иерусалима, якоже выше писах ти. И ныне глаголю: блюди и внемли, благочестивый царю, яко вся хрестинская царьства снедошася в твое едино, яко два Рима падоша, а третей стоит, а четвертому не быти: уже твое хрестианьское царсво инем не останется, по великому Богослову, а христианской церкви исполнися блаженнго Давида глагол: Се покой мой в век века, зде вселюся, яко изволих его. […] Бог же мира, и любви, и долголетства, и здравия молитвами пречистыя богоматере и святых чюдотворьцев и всех святых да исполнит твое державно царство.
|
